Poema na revista Mál og Menningar

Í fyrsta hefti Tímarits Máls og menningar á árinu er sérstök áhersla á skáldskap höfunda af erlendum uppruna á Íslandi. Ewa Marcinek tekur við sem hugvekjuhöfundur og fjallar í fyrsta pistli sínum um skáldsystur sína sem er líka innflytjandi á Íslandi og leggur stund á fjöltungubókmenntir. Annar höfundur lýsir ferðalagi sínu úr pólskum smábæ og flakki um Evrópu í leit að óskilgreindu heima sem hún fann svo loks í víðáttum Íslands. Ana Mjallhvít Drekadóttir, Francesca Cricelli og Jakub Stachowiak eiga ljóð í heftinu.

Höfundar sem staðsetja sig á mærum ólíkra landa og menninga hafa oft átt takmarkað aðgengi inn í meginstraum bókmennta og það efni sem hér er gefið út, sett á svið, útvarpað og sjónvarpað endurspeglar ekki endilega menningarlegan fjölbreytileika íslensks samfélags. Raddir sem tala, eða skrifa, með hreim heyrast sjaldan. Ritstjórar Tímaritsins vilja með þessu fyrsta hefti ársins slá tóninn fyrir allt árið og halda áfram að birta raddir sem hafa íslensku ekki að móðurmáli.

Efni heftisins kemur einnig víðar að úr heiminum en oft áður. Didda Jónsdóttir og Brynja Hjálmsdóttir færa okkur ljóðaþýðingar frá Bandaríkjunum, Danmörku og Bretlandi. Birt er grein eftir kúrdísk-sænska rithöfundinn Mehmet Uzun sem þurfti að flýja heimaland sitt og læra að lifa og skrifa í nýrri menningu og tungumáli.

Ólafur Jóhann Ólafsson opnar heftið á nýju ljóði en þar má einnig finna ljóð eftir Guðmund Andra Thorsson og Ingólf Eiríksson, sem færir okkur brot úr frumraun sinni, Klón – eftirmyndasaga, sem er væntanleg síðar í þessum mánuði. Þá birta Katrín Lilja Jónsdóttir, Ísak Regal og Karl Ágúst Úlfsson smásögur í heftinu.

Í áhugaverðri grein fjallar Steindór Erlingsson um hvernig skáldskapurinn lýsti honum leið í gegnum átakanlega lífsreynslu og andleg veikindi. Guðmundur D. Haraldsson fjallar um styttingu vinnuvikunnar í tengslum við heimsfaraldurinn, Þorleifur Hauksson birtir vandaða grein um orðasmíð í skáldskap Steinunnar Sigurðardóttir og Aðalheiður Guðmundsdóttir skrifar um óútgefnar og gleymdar miðaldasögur. Einnig má finna í heftinu umsagnir um nýlegar bækur.